Geseke und Grete von der Specken, Dietrichs Töchter, und ihr Vormund Wilke von der Specken verpfänden dem Knappen Gerlach Swart und seiner Gattin Frau Mechtild für 30 Mark ein Viertel Land in Bardenfleth. Wi greve Cord van Oldenborch bekennet unde betughet openbar in dessen breve, dat vor uns ghewezen Ghese unde Grete Dyderkes doghtere van der Specken unde Willeke van der Specken ere echte unde rechte vormundere unde bekanden des, dat se mid willen unde mid vulborde al erer rechten erven hedden ghezath unde zettet in dessen breve Gherleghe Zvarten enen knapen unde vorn Mechtelde ziner echten husvrowen unde erer tvier rechten erven unde den ghenen, de dessen jeghenwordighen bref under zik heft mid eren willen, en verdendel landes, dat gheleghen is to Bardenvlete, dat Eier Roben zone nu buwet unde uppe wonet, mid allen rechte, mid aller tobehoringhe, mid aller slachtenut grotes unde cleynes, beydes in more unde in velde, vor dertyg mark, ene jewelke mark to rekenne by teyn svarschillinghen, alze to Oldenborch ghenge unde gheve zint, de Ghesen unde Greten unde Willeken to erer hand vorghenomet tomale zin betaled, mid alzodanne underschede, dat Gheze unde Grete ophte Willeke ere Vormund vorghenomet moghen dat voresprockenne verdendel landes mil aller slachtenut to allen zunte Micheles daghe lozen vor de vorbenomden dertig mark, wo ze Gherleghe unde zinen vorghenomden erven unde den ghenen, de dessen bref mid eren willen heft, de lozinghe kundeghen in deme hilghen dage zunte Olrekes, de dar neghesten vore kumth, meven Cherlech unde zin wyf unde de ghene, de dessen bref mid eren willen heft, en moghen binnen dessen neghesten teyn jaren nyne lozinghe kundeghen, alze se na dessen teyn jaren moghen don, ok in der zulven wyse den alze voreschreven steyt. Vortmer hebbet Gheze unde Grete unde Willeke ere vormundere vorghenomet mid zamender hant in truwen ghelovet Gherleghe unde zinen wive vorghenomet unde zinen rechten erven unde den ghenen, de dessen bref mid eren willen under zyk heft, ene vaste untobrokenne warscap to dünne in den gude vorenomet unde in aller tobehoringhe des gudes nu, wanner unde wor um des nod is unde se dar umme manet. Na den dat Gheze unde Grete vorenomet nyne inghezeghele en hebbet, zo bruket se Willekens inghezeghels vorghenomet eres Vormundes, dat mid unzen inghezeghele ghehenghet is to dessen breve, de screven is na Godes borth drutteyn hundert jar in deme achte unde sesteghesten jare in deme hilghen avende zunthe Thomazes des hilghen apostels. 1368 Dezember 20 (Na Godes borth drutteyn hundert jar in deme achte unde sesteghesten jare in deme hilghen avende zunthe Thomazes des hilghen apostels)
