Kirchherr Dodico von Langwarden beurkundet, dass Tyade Ulbrandes vor dem Vikar Iva von der alten Kapelle daselbst ihre Erbgüter zu Hundrikes im Kirchspiel zu Langwarden dem Häuptling Tante Ummeide gegeben hat. Wytlik unde openbare sii allen krystenluden, de dessen breff zeen uft hören lesen, dat yk her Dodico, kerchere to Langwarden, was eyn medeschedesman, alße Tante Umalde unde syne kindere van der eynen unde Tyade Ulbrandes unde oere kindere van der andern siiden umme Sochsen erwegodere belegen to Hundrikes in deme kerspele to Langwerden, dat yn desser manere wart ghesonet unde voreynichet, so dat her Iva, de eyn vicarius was to Langworden in der olden kercken unde was belenet myt dem altor sancti Kristofori, scolde dat openbarliken spreken in jegenwardycheit der kerspellude to Langwerden van deme predikestole, dat Sochse vorbenomt Tiadde [.. .] biisunderen [...] gegeven oer ervegodere belegen to Hundricke deme gnante Tante Umalde, syne erven boren unde ungeboren to ewiigen tiiden, so scolde gnante Tante unde syne erven boren unde ungeboren de vorbenomd ervegoder besitten unde bruken des na eren egen wyllen. Dat yd so ghescheden sii, so vorscreven ys, hebbe yk her Dodico kerchere vorbenomd to bewysinghe unde eyner orkunde der warheyt myn ingesegele hanghen heten benedden to desseme breve, de gegeven ys na Godes bort dußent veerhundert in deme negen unde voftygesten des hiilgen avendes sancti Mathie apostoli. Datierung: 1459 Februar 23 (dußent veerhundert in deme negen unde voftygesten des hiilgen avendes sancti Mathie apostoli)
